بتاريخ :
18 أغسطس 2009 
تصنيف :
سَوَالفْ 
3,124 مشاهدة 
تعليقات: 25
صباح / مساء الخير على الجميع .. حاب اليوم أدردش معكم في موضوع مهم عن مطاعم ” الوجبات السريعة ” .. طبعاً أكثرنا يعرف إن الوجبات السريعة لها أضرار لا حدود لها .. وإن أكل البيت هو الأكل الصحي والمفيد للجسم .. لكننا نضطر في بعض المرات إننا نشتريها .. وراح أتكلم في هالموضوع عن بعض مطاعم الوجبات السريعة المنتشرة عندنا .
*مطاعم كنتاكي :
كنت زمان من رواد هذا المطعم لكن الحين نادراً ما أروح له ، لأن أكلهم كله زيوت ودجاج للأسف غير طازج يعني لو طلبت منهم بروستد ما يقليه لك بعد طلبك لكن يعطيك دجاج مطلعه من الزيت من ساعة وحاطة على حمايات ! والنظافة بصراحة ” مشي حالك ” .
حقيقة الزين عندهم الدجاج السبايسي ” الحار ” على شرط يكون توه طالع من الزيت ، وبخصوص السندوتشات ما يعجبني عندهم إلا التويستر .. سعرها رخيص وطعمها لذيذ .
*مطاعم برجر كنج :
حقيقة هالمطعم أكله ما فيه أي قيمة غذائية ولو أكلت منهم أي برجر أحس المعدة عندي تنحاس !! عموماً أنا إذا أضطريت أشتري منهم أخذت لي تشكن رويال لأنها أفضل الموجود .
*مطاعم هرفي :
على الرغم من إن المطعم سعودي ويوظف السعوديين وله زبائن واجد إلا إنه ” سيء ” وحصلت لي قصص كثيرة معه وسمعت من الزملاء سوالف وتجارب عنه ماهي طيبه أبد ! ومن هالسوالف أنا عن نفسي أخذت مره من عندهم بروستد ولما وصلت للبيت وفتحته للأسف حصلت البروستد بارد والدجاج أسود يعني واضح إن هالطلب مسويه قبل 3 أو 4 ساعات ومحمينه في المايكرويف يعني نصب عيني عينك ! وبرضوه أحد الزملاء يحكي لي قصة أخوه مع هالمطعم يقول أحد أخوانه اشتغل في هرفي وكان يعد وجبات سريعة ويقول تخيل إن بعض الخضار اللي يستخدمونها في السندوتشات ( خس / طماطم ) بعضها معفن وقديم ! ويجبرونك على استخدامها ولما رفض أخوه يغش الناس قالوا له ” أنت مفصول ” ! .. برضوه فيهم حركة تكررت أكثر من مره وهي في وجبات الأطفال فأحد أقاربي يحكي لي إنه مره أشترى منهم وجبة لبنته الصغيرة ولما رجعوا للبيت لاحظوا إن الأكل متعفن وفيه نقط سوداء ! بس الله ستر إن البنت ما أكلت شيء .
هرفي أقولها وبصراحة مطعم أي كلام وأشوف إنه ما يستاهل كل هالشهرة .
مطاعم : كودو
كودو بالنسبة لي أشوفه أفضل مطعم للوجبات السريعة لأسباب كثيرة فيكفي إنه سعودي والعمالة اللي فيه نظيفين وتشوفهم قدامك وهم يجهزون طلبك ويجيك الطلب طازج .. وعندهم بعض الطلبات الصحية مثل السلطات والدجاج المشوي على الصاج وبرضوه عندهم ساندوتشات على الخبز ” الأسمر ” الصحي .. أحب من عندهم الكلوب ساندوتش وكودو دجاج وما أنسى فطورهم رايق .
اللي يعيبهم بالنسبة لي رفعهم للأسعار بشكل كبير وفي فترة زمنية قصيرة جداً !
ماكدونالدز :
هالمطعم عشاقه كثار .. أنا يمكن ما يعجبني عندهم إلا ماك تشكن وماك عربي بس .. وفي الحلا ماك فلوري .. أما بقية وجباتهم ما أعجبتني .. المطعم يعاب عليه الزحمة الشديدة خصوصاً في بعض فروعهم .. وبخصوص النظافة وسط صراحة .
مطاعم الطازج :
مطعم جيد عندهم الفروج صحي جداً وخبزهم حلو وحار والنظافة ممتازة .. أنا أعتبره من البدائل الجيدة ويكفي إنه سعودي .
مطعم برجر مشوي 777 :
مطعم سعودي متخصص في البرجر حقيقة رايق أكلهم نظيف جداً و ” صحي “.. الدجاج واللحم تحسه صافي ما فيه إضافات ويقدم مشوي على الصاج .
يعاب على هالمطعم إن ماله فروع .. مالهم إلا فرع واحد في طريق الملك عبد العزيز ( مخرج 5 ) وهذا مسبب زحمة شديدة عليهم .. يعني انتظار الطلب يحتاج ما لا يقل عن 30 دقيقة !!
في النهاية أنا تكلمت عن بعض المطاعم اللي تقدم الوجبات السريعة .. ودي أسمع عن تجاربكم معهم ودمتم بخير .
مطاعم الفاست فود مشاكلها كثيرة
ماسمن البزران والشباب إلا هالوجبات خصوصاً البرجر والبطاطس المقلي
انا ما أحرص كثير على الوجبات السريعة يعني آكلها في الشهر مرة
أحب إذا طلعت لمطعم يكون مطعم يقدم أكل شرقي غالباً خصوصا المشاوي
أموت فيها yaamy
من المطاعم الي ذكرتها يعجبني الطازج اكله حلو ولاتفوتكم بسبوستهم حلوة
واسوأ مطعم ذكرته هو كنتاكي ما أحبه اكلهم يجيب المرض ss-9
شكرا عـ الموضوع فصول
يعطيك ألف عافيه ع الموضوع
انا شخصياً مالي تجارب مع الوجبات السريعه
يعني نادر جداً جداً اكل يعني اذا كنت مثلا طالعه اتسوق
وقبل مانطلع من المجمع نتعشى هنا اكل وجبه
او بالجامعه ..
بس الحمدلله ماعمره صارت لي مشكله ss-9
مطاعم الوجبات السريعة وقصتي معاها
سوف ابدا بالمطاعم تباعا”
مطاعم ” دجاج كنتاكـي ” : كنت من رواد هذا المطعم بشكل اسبوعي وبعد ان سبب لي الآم تركتـه و حتى الآن فتح فرع قريب جدا ولكم لم ازره الا مرتين من سنه كامله .. وكنتاكي النظافة سيئه وكما اسلفت بإنه الدجاج غير طازج وهذا لا يشجعني ابدا ان ارجع له ..
الوجبة المفضلة : الدجاج السبايسي + ساندويش تويستر
مطاعم ” برجر كـنج ” : مطعم لا اذهب له الا نادرا وانا بصراحة ما ارتاح لأكله : لأن مره اكلت منه فسبب لي إسهـال m–m
الوجبة المفضلة : لا يوجد
مطاعم ” هــرفـي ” : استبشرت خيرا بـ إفتتاح المطعم بقربنـابصـراحه كنت اروح لهـرفي مرة على الأقل في الأسبوع فلاحظة بعد فترة ان الأكل بدا يتغير مره يصير بارد ومره الدجاج اسود وكما اسلفت في موضوع الطماطم و الخس فلا يستطيع ان يرمي الخس او الطماطم لأنها محسوبة عليهم .. ولاحظت في هرفي زيادة الأسعار بشكل كبير وإستغلالي .. ولا تنسى 2 ريال للتوصيل المطاعم الأخرى التوصيل مجاني fi-1
الوجبة المفضلة : ساندويش تورتيلا
مطعم كودو : انا احب هـ المطعم :D اكله نظيف وكما اسلفت الأكل قدامك تشوفه وصراحة فطـور كودو dr1 راااايق وبقوة .. لكن كودو رفع الأسعار no:0 بشكل جنوني ,, ولكن النظافة اولا . واعتبر كودو افضل معطم وجبات سريعة بالنسبة لي .
الوجبة المفضلة : فطور كودو – غداء كودو – ساندويش كودو دجاج yaamy yaamy
ماكدونالدز : نادر اكل منه — مشكلته الطلب يجلس احيانا 40 دقيقة gr-a gr-a gr-a
الوجبة المفضلة : ماك تشكن سبايسي + ماك فلوري ( اورويو )
مطاعم الطازج : صراحه المطعم هذا كسب شهرة واسعة في السعودية لكن بدأت الاحظ النظافة sa:1
الأكل لذيذ خاصة الفروج المشوي ويتميز دجاج انه طازج على اسمه ولاحظت ان المطعم بدأ يضيف وجبات : الأرز وهنا المشكله يقول المثل : صاحب صنعتين كذاب
يعني الرز عندهم فااشل لأن الرز لأهل الرز والمطابخ ..
الوجبة المفضلة : الفروج المشوي + ساندويش الكباب
برجر مشوي: صراحة المطعم هذا عاجبني وبقوووة اكله صحي ولذيذ
يعاب عليه : صغر المحل + تجهيز الطلبات كما اسلفت وقلة الفروع
يمتاز : بإشراف ســعــودي وهذا الي يطمنك وان شاء الله لي زيارة قريبه له
موضوعك صراااحة جميل ورااايق :: وانـا sm1 قلت رأيي بصراحة وانطبعاتي عن مطاعم الوجبات السريعة ..
يبقـي أكـل البــيــت انــظــف ولــكــن لابــد مـن الــتــغــيـر
:I: نـنـتـظــر جــديــدك
حبيت اضيف حاجة : مطعم كنتاكي وماكدونالدز .. تدعم اليــهـود .. وهذا ايضا ما يشجعني اشتري منـه .. وكنتاكي ما شفت عنده سعوديين لاني مازرته من سنه
لذلك .. كودو عندي رقم .. 1 ..
1/ يوظف السعوديين 2/ نظافة 3/ المالك سعودي 4 / المطعم هادي وجوه حلو
5 / المطعم يقدم فطور وهذي ميزه عن باقي المطاعم
6/ عاملة كودو عمالة جيده حتى لو غلط بالطلب يعتذر وأسلوبها coo:1
شكـــــرا جزيلا لك
استمتعت كثيرا بالقراءه smi-0
انا مو من عُشاق الوجبات السريعه .. أكلها كـ مره في الأسبوع أو تحت أي ظرف جوع طارىء ومالي خلق أصلح شي dr1
كـ تجربه لاحظت ان فروع بعض المطاعم تختلف بمعنى لو أخذ من هرفي أو مكدونالدز من أي منطقه في جنوب الرياض مثلا .. مو نفس الشمال !
والفترات تلعب دور كثير., ممكن تطلبين ساندوتش بعد العشاء مباشره ويطلع لذيذ جداً
وتشتهين تجربيه مره ثانيه وتطلبين بعد 12 ,, ويجيك بايت جداً وسقيم وشغل مشي حالك !!
المطعم الي مستحيل أخذ منه / بيتزا هت وبرجر كنج
ولو لاحظتي فيه ريحه عجيبه نشمها في مطاعم بيتزا هت غير أي بيتزا !!
يعني شي مو صحي أكيد
وأنا من الناس الي احكم ع الشي من ريحته gla1
أخيراً نقول / ما فيه ألذ من طبخ البيت
الوجبات السريعة وما أدراكم ما الوجبات السريعة ..!!
انا أعتبر من مدمنيها ، لزم يوم وترك على الأقل أمر على أحد هذي المطاعم ، وأكثر ما اطلب..
1- كنتاكي.
2- برجر كنج .
3- بيتزا هت .
4- ماكدونلدز .
والصراحة قاعد أحاول أقلل قدر المستطاع لأن ضررها اكثر من نفعها ، ولكن العزوبية وما تسوي ^_^ !!
مدونة جميلة ، وأتمنى تكون زيارتي الأولى خفيفة عليكم ،،
“الأندلسي”
عالئتنا من مناصري طازج ووبشدة .. خصوصاً الفرع اللي تحته كفي راايق ونظيف وتحلي بعد العشا مباشره :)
هرفي انصدمت منه ><
وفي كل الأحوال .. دائما ما أحاول ألا أضطر إليها أبداً ..
ومستحيل أأكل وجبتين سريعه في نفس الاسبوع ..
شكراً على الإفادة ..
امممم انا من المعارضين للوجبات السريعه ومستحيل اقدر اكلها
كنت سابقاً من المحبين لها بس الحمد الله قدرت اقطعها نهائي
في بعض المطاعم يكون اكلها مفيد وكويس وصحي ولو انه هالشي نادر
وانا افضل المطاعم الايطاليه لئني من محبي الاكل الايطالي
وفطور كود راايق حق بنات ملتمين قبل الجامعه
بس اكيد في المرتيه الاولى اكل البيت
اخي الكريم فصول .
الحقيقه انا اكره الوجبات السريعه وارى انها مرض اكثر منها فائده
زيوت واكل غير نظيف وعماله غير نظيفه الا من رحم الله .
الوحيد الي احب اكل منه الطازج ولاالبيك والباقي ماجي ناحيتها بتاتاً
لك الشكر فصول ..وكل عام وانت بخير
مرحبا راشد
الطازج فعلاً من المطاعم الجميلة
وأحسدك لتقليلك من الوجبات السريعة dr1
حضورك أحلى من بسبوسة الطارج f1
فاطمة أحسدك على بعدك عن الوجبات السريعة
لأنك بخير ونعمة
ربي يعافيك ..
هلا بثامر ردك صراحة مفصل وأتفق مع أغلب كلامك
تعليقي فقط على مطاعم الطازج
صحيح إنه يقدمون وجبات الرز لكن للأمانة
الوجبات ناجحة وعليها إقبال كبير
لكن بالنسبة لي يظل الفروج الأفضل عندي
ماذكرته عن كودو كلام صحيح لذا أرى أنه يبقى الأفضل
لك كل الشكر f3
اُخرى هلا فيك f2
أنا رجل مو بنت angil1
ملاحظتك صحيحة أختي .. فعلا المشكلة إن المطاعم فروعها ماهي سوى
وأصلاً حتى الفرع نفسه مستواه متذبذب
أحيان يقدم لك وجبة ساخنة ولذيذة وأحيان يجيبها بايته sa:1
ومثل ما قلتي مافيه أحلى من أكل البيت yaamy
مايا .. العفو وأنا استمتعت بحضورك smi-0
زمان الوصل هلا فيك شرفت smi-0
الله يعينك على هالوجبات أنتبه لصحتك :)
تحياتي لك f3
اَلْجُمَآنْ..
فعلا الطازج أكلهم نظيف وحلو
وترتيبك لأكل الوجبات السريعة جيد
بخصوص هرفي نصيحة أبتعدي عنه لأنه ” مرض ” sa-1
تحياتي لك ..
برستيج .. والله عملك إنجاز :I:
عقبال الجميع إن شاء الله ..
آه يا فطور كودو يمي yaamy
شكراً لتواجدك
بوح القلم
حياك ربي .. الطازج لايوجد خلاف عليه
بخصوص البيك أنا ما أكلت منه إلا مره وأكلهم وسط
بخصوص النظافة أعتقد فيه موضوع في الإنترنت
عن إغلاق فروع لهم لحالات تسمم ss-9
الله يكفينا الشر ..
تحياتي لك ،
برجر كنج و كنتاكي و هرفي صاحباتي يتسممون منه كثير
عني ما اعطاني الله حب الفاست فود أحب الطازج و المطاعم العامة اللي تبيع
شيش طاووق أما ماك و كودو و غيرها ما افضل بصراحة
كودو و ماك و بس….أما البقية خصوصا “كنتاكي” مايسوى بريال..
البيك و بس :)
تحياتي لكي….
صراحة أنا ما أحب الطلب من المطاعم السريعة .. بس بيني وبينك اشتهيها مرات
ومااشجع اطلب منها الا اذا مالي نفس ابد للطبخ وهذي مو دايم لأني أحب أكل البيت و أغصب نفسي وريحني بالأكل
تقييمي للمطاعم اللي ذكرتها ..
كنتاكي : ابد ابد مو كويس .. ولا تحس بطعم الأكل فيه .
برجر كنج : ما اطلب منهم الا رويال تشكن .
هرفي : لاحظته يختلف من فرع لفرع .. والفروع إللي ما توصل للمنازل هي اللي تكون كويسه مره وطازجة .. طحت على فرع بالشرقية ما صرنا نطلب
إلا منه .. خسهم وخضارهم طازج دايم ومقرمش .. حتى الطبخ طازج .. و أقدر أشوفهم وهم يشتغلون بأغلب فروعهم .
كودو : أحبه .. بس أمي حرمت تشتري منه وحرمت اخواني .. لسبب انه جاهم الطلب مره وفيه أجزاء من حشرات .. بس ما كنت معهم في وقت الطلب
وبصراحه أنا أحب هالمطعم وأرتاح له .. وفطورهم رايق وحلو ويفرج للواحد مرات يشبه فطور البيت .. والسبشل لنش مميز على اسمه ..
الطازج : ما أحبه أبد أبد .. دايم يجي فيه صنقة دجاج و لا أقدر أكمل أكلي ..
ماكدونادز : أغلب فروعهم إللي أروح لها نظيفة وشغلهم كويس .. أحب عنده سلطة السيزر + ماك رويال + ماك فلوري [ أوريو ]
وبس …
شكراً تفاصيل ع الموضوع … والله يكفينا شر المطاعم
السلام عليكم ..
هذه زيارتي الأولى لمدونتك الرائعة ..
بالنسبة للوجبات السريعة أرى أن الضرر لا يختلف باختلاف المطعم ..
والعلة في احتوائها على سعرات حرارية عالية , والسعرات هذه إن لم يتم حرقها بالتمارين الرياضية , فستعمل على تحفيز الخلايا السرطانية , وهذا هو سبب الربط ما بين الوجبات السريعة والسرطان اجارنا الله وإياكم منه
بالتوفيق دائما
سلام عليكم اخوي فصول
صدقت والله مشطب على كنتاكي من زمان من كثر فضايحهم
وسلم لي على الطازج وكود وماكدونالديز :) هم بعد عندك هرفي رهيب
وي وي يخليك ربي
thanks my dear