السلام عليكم ورحمة الله وبركاته ،

صباح / مساء الخير يا حبايب ..

حبيت أعرض عليكم آخر تصميم لي بالفوتوشوب

عنوان العمل : It’s Just A child’s Dream

مدة العمل : تقريباً 4 ساعات متقطعة

التصميم :

إضغط هنا لرؤية التصميم

أنتظر تعليقاتكم وملاحظاتكم ،

تحياتي لكم .

السلام عليكم ورحمة الله وبركاته
مساء الورد ( قلت مساء لأني كاتب الموضوع في الليل :)  )
اليوم ياحلوين حاب أتكلم عن موضوع ” الحلويات ” الكل يعرف إن الحلويات الآن أشكال وألوان فيه منها الغالي وفيه منها الرخيص ، لكن ما أدري ليه الحلويات القديمة أحلى بكثير من الحلويات الموجودة في هالوقت ! كنت في الأول مفكر حلويات أول إنها أحلى لأني كنت وقتها صغير والآن لما كبرت صارت الحلويات مالها أهمية كبيرة عندي فأشوف إنها عادية ، لكن الواقع إن الحلويات القديمة أحلى بكثير من الجديدة وهالكلام يعرفه أي شخص ” مخضرم ” عاش وذاق الحلويات القديمة .
الكثير من الحلويات الي نعرفها في هالوقت وكنا ناكلها زمان مثل ” تويكس / باونتي / ماكنتوش ” وغيرها .. نلاحظ تغير طعمها عن أول والسبب الرئيسي في تغير طعمها هو أختلاف أماكن صنعها يعني مثلاً عندنا ماكنتوش أول كان يصنع في إنجلترا وتحس فيه طعم الككاو صح .. لكن الحين صار يصنعونه في أكثر من مكان مثل جنوب إفريقيا ( تكتيك إقتصادي ) علشان يخفضون قيمة تكلفة المنتج لكن للأسف جودة المنتج قلت كثير ، وبرضوه لاحظت تقليد كثير للمنتجات الي كانت معروفه أول كشكل لكن الطعم فرق السماء عن الأرض .
عموماً أنا حاب أعرض عليكم بعض الحلويات القديمة عشان نتذكر مع بعض أحلى أيام العمر .

ببدأ بـ حلاو رانتس أو زي ماكنا نسمية حلاو ” الفواكة ” حقيقة أتمنى أحصله بحثت عنه في كل مكان بس ماله أي وجود الحلاو كان يجي على شكل فواكة ( ليمون ، موز ، تفاح ، فراولة ، كرز ، برتقال ) كنت أحبها كلها ما عدا الموز دايماً أسحب عليه .

هذا علك قرندايزر قديم مرة أنقطع من السوق من زمان كان يجي داخل الكيس علك صغير لونه أصفر طعمه خيال ومعه بوستر صغير وصورة تتلصق لشخصيات المسلسل الكرتوني المعروف جرندايزر .

حلاو الساعة أذكر كنا نلبسه في يدنا وكل شوي نعرم فيه ههههههه وأتذكر الساعة ثابته مايتغير الوقت وحنا كل شوي نناظر نشوف كم الساعة ” صدق بزران ” ، أعتقد الحلاو رجع مره ثانية للسوق لكنه مقلد .

عيدان الككاو من أولكر الله على طعمه والبسكوت الهش الي يجي معه .. أذكر كنا نحطه في فمنا كننا نشرب دخان !

حلاو ماكنتوش أشهر من نار على علم .. إلى الآن موجود لكن أغلبه غير أصلي ونادراً ما تحصل الي صناعته ” إنجليزي ” أحب فيه الي تجي صفراء بطعم التوفي والموفية خطيرة ولا أنسى ذيك الخضراء الي تجي على شكل علامة مرسيدس .

حلاو مصاص أبو صفيرة نمص شوي ونصفر فيه شوي ههههههههه كانوا الأهل يتأذون من تصفيرنا أنواع الإزعاج !

ككاو كيت كات معروف طبعاً .. لكن كثرت أنواعه في السوق وماعاد صرنا نعرف وش الأصلي وش التقليد ! نوع يقولون تقليد ونوع نص أصلي ونوع أصلي مرة !! يازين كت كات أول نوع واحد ويجيك بقصدير والطعم حكاية ثانية .

حلاو مصاص قديم مرة الي يتذكره منكم له جائزة هههههههههه هالحلاو مره مختفي من زمان أتذكر طعم المصاصة كنها طحين !

هذا مدري إذا أحد منكم يذكرة ! قديم جداً ومقطوع من السوق كان طعمه حلوو .

علك بباي يجي لونه أخضر وعلى شكل شرائط مقطعه كأنه السبانخ الي ياكلها بباي ، أذكر زمان كنا مخفات نشتري العلك وناكله ونجلس نتسابق ونوهم أنفسنا إننا صرنا أسرع وأقوى زي بباي !! عموماً العلك ماله وجود الآن .

حلاو الببسي معروف وطعمه حلوو بس مادري هل هو موجود أو لا ! أنا ما أضحك إلا لما كنا بزران كنا نجيب دبوس صغير وننغز الحلاو نبي الببسي الي داخله ينقط !!

هذا يجي مثل حلاو البلك ينحط في هاللعبة ونضغط الزر الي فيها ويطيح لنا حلاوه .. أذكره كان ينباع في ميد بس كان سعرة غالي .
—
في نهاية هالموضوع أتمنى يكون أعجبكم وياليت أسمع سوالفكم وذكرياتكم مع عالم الحلويات .

السلام عليكم ورحمة الله وبركاته

صباح / مساء الخير للجميع .. حياكم الله زوار مدونتي ، حقيقة الكثير عاتبني على إبتعادي عن الكتابة في المدونة .. وهذا راجع لأنشغالي سواء في العمل أو خارج العمل وأنا من النوع اللي ما يعرف يكتب إلا إذا كان ذهنه مرتاح . عموماً حبيت أن أعود للمدونة بتصميم بسيط جداً وهو عربون عودة لصديقي ” الفوتوشوب “وهو بعنوان ( أشباح اليأس ) وأتمنى توصل لكم الفكرة كما يجب ..

إضغط هنا لرؤية التصميم

رأيكم يهمني يا أصدقاء

:)